Бишкек, 31.01.25. /Кабар/. Бүгүн Билим берүү жана илим министрлигинде техникалык окуу жайлардын альянсы жөнүндө келишимге кол коюлду.
Ведомстводон маалымдашкандай, анын негизги максаты билим, тажрыйба жана ресурстарды алмашуу аркылуу техникалык билим берүүнүн сапатын жогорулатуу болуп саналат.
Министрдин орун басары Расул Абазбек уулу ар түрдүү чакырыктар, тобокелчиликтер билим берүү системасынын алдында турганына карабастан акыркы үч жылдан бери окуу жайларга автономияны берүү боюнча аракеттердин аркасында өзгөчө статусту алган университеттердин саны 11ге жеткенин билдирди.
Альянстын курамына 7 техникалык окуу жай кирди:
- И. Раззаков атындагы Кыргыз мамлекеттик техникалык университети;
- И. Абдраимов атындагы Кыргыз авиациялык институту;
- М. Адышев атындагы Ош технологиялык университети;
- К. Көлбаев атындагы Бишкек автомобил-жол колледжи;
- Бишкектеги курулуштагы архитектура жана менеджмент колледжи;
- М.Т. Ибрагимов атындагы Токмок индустриялык-педагогикалык колледжи.
Макулдашуу окутуунун кош формасын пайдалануу менен окуу жайлардын базасында өндүрүштүк базаны өнүктүрүүнү да камтыйт. Бул студенттерге теориялык даярдыкты өнөр жайдын чыныгы муктаждыктарына багытталган практикалык иш менен айкалыштырууга мүмкүндүк берет.
Альянстын координатору болуп И. Раззаков атындагы КМТУ дайындалды, ал координатор катары билим берүү программаларын уюштуруу, илимий жана инновациялык долбоорлорду ишке ашыруу, ошондой эле бизнес жана өнөр жай өнөктөштөрүн тартуу үчүн жооптуу болот.
Келишим бардык тараптар тарабынан кол коюлган учурдан тартып күчүнө кирет.
