Бишкек, 28.08.26. /Кабар/. Кочкор районундагы Кочкор айылында 500 орундуу И. Арабаев атындагы жаңы мектеп курулду.
Курулуш министрлигинен билдиришкендей, долбоор республикалык бюджеттин эсебинен каржыланды. Мектептин курулушу 2023-жылдын октябрь айында башталган. Бүгүнкү күндө курулуш иштери толугу менен аяктап, жаңы окуу жылында пайдаланууга берүүгө даярдалды.
"Жаңы мектеп үч кабаттуу заманбап үлгүдө курулуп, жалпы аянты 4136 чарчы метрди түзөт. Билим берүү мекемесинде окуу класстарынан тышкары лаборатория, китепкана, ашкана, компьютердик класс, эмгек кабинети, дарыгердин бөлмөсү, жыйындар залы жана бардык шарттары бар спорт залы каралган",-деп айтылат маалыматта.
Мындан тышкары, мектептин аймагында футбол, волейбол, баскетбол үчүн жана машыгуу аянтчалары курулду.
