Бишкек, 28.02.25. /Кабар/. Бүгүн президенттин Ош облусундагы өкүлү Элчибек Жантаев Кара-Суу районунда таштандыларды өрттөө заводун куруу долбоорун ишке ашыруучу кытайлык компаниянын өкүлдөрү менен жолукту.
Өкүлчүлүктөн билдиришкендей, жолугушууда долбоорду ишке ашыруу маселелери, анын учурдагы абалы жана ишкананы ишке киргизүү боюнча мындан аркы кадамдары талкууланды.
Президенттин өкүлү белгилегендей, Ош облусу чет элдик инвестицияларды тартууга жана бизнес үчүн жагымдуу шарттарды түзүүгө өзгөчө көңүл бурат. Ал бул долбоор аймактын экономикасын өнүктүрүүгө гана салым кошпостон, экологиялык маселелерди чечүүдө маанилүү кадам болорун баса белгиледи.
Өз кезегинде компания өкүлдөрү облус бийлигинин колдоосуна ыраазычылык билдирип, заводдун курулушуна жана ишке киргизилишине байланыштуу бардык милдеттенмелерди аткарууга даяр экендиктерин ырасташты.
Жолугушуунун жыйынтыгында тараптар долбоорду ийгиликтүү аяктоо жана анын мындан аркы иштеши үчүн тыгыз кызматташууну улантууну макулдашышты.
