Бишкек, 17.11.25. /Кабар/. Go Bus транспорт кызматы туристтерге коопсуз, ыңгайлуу жана жеткиликтүү жүргүнчү ташууну камсыз кылат. Бул тууралуу «Биринчи радионун» эфиринде Туризмди өнүктүрүүнү колдоо фондунун Эл аралык кызматташтык жана туризмди өнүктүрүү бөлүмүнүн башчысы Дамир Жумаканов билдирди.
Анын айтымында, Go Bus билеттерди дүйнөнүн дээрлик каалаган жеринен сатып алууга мүмкүндүк берет — интернет-банкинг, электрондук капчыктар, ошондой эле накталай төлөм же которуу жолу менен.
Бишкек—Каракол багытынан тышкары, быйыл Ысык-Көлдүн түштүк жээги боюнча жаңы маршрут ачылды. Кышкысын Караколдон тоо лыжа базасына чейин сезондук каттам иштей баштайт.
Сервистин өзгөчөлүгү жүргүнчүлөрдүн санына карабастан, автобустардын каттам графиги так сакталат.
Туристтердин ыңгайлуулугу үчүн Go Bus мобилдик тиркемеси иштейт, ал Google Play жана App Store дүкөндөрүндө жеткиликтүү. Тиркемеде актуалдуу маршруттарды карап чыгууга, каттам графигин текшерүүгө, билеттерди брондоого, ошондой эле чат-бот же колл-борбор аркылуу консультация алууга болот.
Жумаканов чат-ботту ташуучу компания көзөмөлдөй турганын белгиледи, анткени жасалма интеллект дайыма өркүндөтүүнү талап кылат.
«Тиркеме ишке киргизилгенден кийин бир нече ирет жаңыртылды, анын ичинде эл аралык гранттын колдоосу бар. Чат-бот өнүгүүдө, ал аркылуу дээрлик бардык маалыматтарды алууга болот», — деди ал.
Go Bus каттамдары туристтик агымга жараша уюштурулат. Сервис географиясын кеңейтип, кошумча маршруттарды тейлөөнү улантат.
