Бишкек, 28.01.25. /Кабар/. Бүгүн мамлекет башчыбыз Садыр Жапаровдун президенттик кызматка киришкенине туура төрт жыл болду. Эң негизги жетишкендик - элде үмүт жаралды, оптимизм маанайы түзүлдү. Бул тууралуу министрлер кабинетинин төрагасынын орун басары Эдил Байсалов Facebook социалдык тармактагы баракчасына жазды.
"Буга чейинки АКШнын эл аралык республикалык институтунун (IRI) социалдык сурамжылоосунун жыйынтыктарына ылайык, былтыр январда сурамжылоого катышкандардын 82%ы "мамлекет туура багытта өнүгүп жатат" деп жооп берсе, азыр бул көрсөткүч 91%га жетти. Андан мурунку рекорд дагы ушул эле Садыр Жапаровго тиешелүү болчу (85% - август 2022).
Былтыр президентибиздин жеке персоналдык колдоо-жактыруу рейтинги 88% болсо, азыр 95%га жетти. Америкалык изилдөөчүлөрдүн айтымында, бүгүнкү дүйнөдө мамлекет жетекчилердин арасында мындай аналог жок. Изилдөөчүлөрдүн мындай баасы толкундатпай койбойт.
Акжолтой президентибизге күч-кубат! Мекенибизге тарыхый өзгөрүүлөрдү алып келген Сиздин командаңызда болгонубуз бизге эң чоң сыймык! Элибизге ак кызматыңызды уланта бериңиз", - деп жазды ал.
