Бишкек, 31.03.26. /Кабар/. Султан Ибраимов атындагы Ош улуттук драма театрынын Бишкек шаарындагы жумалыгы 30-мартта "Бир келип кетчи Ош жакка" спектакли менен башталды. Бул тууралуу Маданият, маалымат жана жаштар саясаты министрлигинен билдиришти.
Маалыматка ылайык, спектакль Т. Абдымомунов атындагы Кыргыз улуттук академиялык драма театрында өттү. "Бир келип кетчи Ош жакка" спектакли КР Эл жазуучусу Арслан Койчиевдин "Тагдыр жөнүндө ыр" чыгармасы боюнча коюлду.
Бул чыгарма улуттук тарыхтын татаал барактарына жетелеп, адам тагдыры менен доор сыноосунун айкалышын терең философиялык деңгээлде ачып берет. Спектаклде 30–40-жылдардагы кыргыз айылынын турмушу, экологиялык көйгөйлөр, ошондой эле репрессия жана Улуу Ата Мекендик согуш сыяктуу тарыхый окуялардагы адам тагдыры, согуштун азабы жана Мекенден алыс жүргөн адамдын ички трагедиясы чагылдырылат.
Спектакль бүгүн, 31-мартта да коюлат. Ошондой эле театр жумалыгынын алкагында дагы бир катар мыкты спектаклдер борбор калаанын көрүүчүлөрүнө тартууланмакчы.
