Бишкек, 26.03.25. /Кабар/. Билим берүү жана илим министри Догдуркүл Кендирбаева Алай районунун Гүлчө айылында жайгашкан № 4 Кадырмамат уулу Абдразак атындагы мектеп-интернатына барды.
Ведомстводон маалымдашкандай, министр мектеп-интернаттын абалы менен таанышып, жалпы жамааты менен жолугушту.
Жолугушууга Жогорку Кеңештин депутаты Жанар Акаев дагы катышты.
Министр Кендирбаева мектеп-интернаттын имараты капиталдык оңдоп-түзөөгө сунушталганын белгиледи. Ошондой эле ал көп жылдык үзүрлүү эмгеги, жетишкендиктери жана билим берүү тармагына кошкон салымы үчүн бир катар мугалимдерге ыраазычылык кат тапшырды.
Мектеп-интернаттын директору Маматжан уулу Саматтын айтымында, азыркы учурда интернатта жалпы 383 окуучу билим алууда, анын 200ү жатаканада жатып окуйт.
Белгилей кетсек, билим берүү министри Догдуркүл Кендирбаева 25-марттан 28-мартка чейин жумушчу сапары менен өлкөнүн түштүк аймагында жүрөт.
