Бишкек, 25.02.25. /Кабар/. Баткендеги 9 айыл өкмөткө экскаватор жана жүк ташуучу атайын техникалар тапшырылды.
Президенттин облустагы өкүлчүлүгүнүн басма сөз кызматынан билдиришкендей, министрлер кабинети менен Ислам өнүктүрүү банкы жана Сауд өнүктүрүү фондунун ортосундагы кызматташтыктын алкагында Коомчулукту өнүктүрүү жана инвестициялоо агенттиги (АРИС) тарабынан “Баткен жана Талас облустарындагы айылдарды суу менен камсыздоону жана санитарияны жакшыртуу” долбоору ишке ашырылууда.
Ага ылайык, Баткен облусунун 43 айылын таза суу менен камсыздоо иштери жүрүп жатат.
Техникалар ушул долбоорго кирген айылдардагы таза суу муниципалдык ишканаларынын техникалык базасын чыңдоо жана курулган суу системаларынын туруктуулугун камсыздоого көмөк көрсөтүү максатында берилди. Техникалардын жалпы баасы 558 миң АКШ долларын түзөт.
Техникаларды алган айыл аймактары:
- Кадамжай районунун Майдан, Үч-Коргон, Масалиев, Молдо-Нияз жана Исхак-Полотхан айыл аймактары;
- Баткен районунун Самаркандек жана Ак-Татыр айыл аймактары;
- Лейлек районунун Сумбула жана Кең-Талаа айыл аймактарындагы таза суу ишканалары.
