Бишкек, 06.02.25. /Кабар/. Бишкектеги Аламүдүн дарыясынын нугун механикалык тазалоонун экинчи этабы башталды.
Мэриядан билдиришкендей, тазалоо иштерине жаңы атайын техника, анын ичинде үч экскаватор, алты ХОВО унаасы жана бир мунара колдонулууда.
Тазалоо иш-чараларын «Бишкек жашыл чарба» муниципалдык ишканасы башка шаардык кызматтар жана Өзгөчө кырдаалдар министрлиги менен биргеликте жүргүзүүдө. Механикалык тазалоо суу ташкындарынын алдын алуунун, суунун сапатын жакшыртуунун жана ыңгайлуу шаар чөйрөсүн түзүүнүн маанилүү бөлүгү болуп саналат.
Белгилей кетсек, тазалоонун мурунку этабы оң натыйжаларды берип, адистердин тобу ишти максималдуу эффективдүү улантууга багытталган.
Эске салсак, биргелешкен аракеттер экологиялык абалды жакшыртууга, жергиликтүү тургундардын коопсуздугун камсыздоого жана жаратылыш чөйрөсүн калыбына келтирүүгө багытталган.
