Бишкек, 13.10.26. /Кабар/. Ысык-Көл облусундагы "Ала-Тоо Резорт" туристтик комплексинин асма жолдорун электр энергиясы менен камсыздоо үчүн 10 кВ чыңалуудагы кабелдин 1,7 чакырымы тартылды. Бул тууралуу "Кыргызстан улуттук электр тармагы" ААКтан билдиришти.
Маалыматка ылайык, учурда 2 чакырымга жакын траншея казылып, үч трансформатордук көмөк чордон орнотуу иштери даярдалууда. Объектилерди электр энергиясы менен камсыздоо боюнча негизги иштерди 15-октябрга чейин бүтүрүү пландалууда.
Ишкананын башкы директору Илгиз Сыдыгалиев иштин жүрүшү менен жеринен таанышып, жумуштарды тездетүү, курулуштун сапатын камсыз кылуу жана белгиленген мөөнөттөрдү сактоо боюнча тапшырмаларды берди.
Белгилей кетсек, "Ала-Тоо Резорт" комплексиндеги асма жолдорду 2026-жылдын 1-декабрында ачуу пландалууда.
