Бишкек, 17.09.26. /Кабар/. Баткенде айылдарды өнүктүрүүгө багытталган "Менин айылым" долбоору уланат.
Президенттин Баткен облусундагы өкүлчүлүгүнөн билдиришкендей, облус башчысынын биринчи орун басары Бактыбек Токсонбаев Түштүк Кореянын Эл аралык кызматташтык агенттиги (KOICA) менен биргеликте ишке ашырылып жаткан "Кыргызстандагы “Менин айылым” долбоорун пост-долбоордук колдоо" долбоорунун эксперттери менен жолугушту.
Жолугушууда долбоордун жетекчиси Ли Мин Хо "Менин айылым" долбоору тууралуу маалымат берди.
Бюджети 670 миң АКШ долларын түзгөн долбоордун негизги максаты — айыл тургундарынын жашоо деңгээлин жогорулатуу, киреше алып келүүчү объекттерди калыбына келтирүү, ошондой эле жергиликтүү топтордун техникалык жана башкаруу мүмкүнчүлүктөрүн күчөтүү.
Долбоор буга чейин ишке ашырылган "Менин айылым" долбоорунун уландысы болуп саналат. Ал Ош жана Баткен облустарындагы төрт айылга багытталган.
Анын алкагында Баткен облусунун Кадамжай районундагы Жал жана Чукур-Кыштак айылдарында тиешелүү иштер жүргүзүлөт.
Долбоордун негизги иш-чаралары төмөнкүлөрдү камтыйт:
- объекттерди оңдоо жана кайра ишке киргизүү;
- жергиликтүү тургундарды окутуу;
- продукциянын сапатын жана таңгагын жакшыртуу;
- тиешелүү сертификаттарды алууга көмөк көрсөтүү;
- продукцияны рынокко чыгарууга көмөктөшүү;
- айылдык өнүгүү комитеттеринин ишин күчөтүү.
