Бишкек, 06.11.26. /Кабар/. "Тамчы" атайын финансылык-инвестициялык аймагы Азиядагы каржы борборлорун бириктирүүгө багытталган NextFinance демилгесин сунуштады.
Экономика жана коммерция министрлигинин маалыматына караганда, ал Гонконгдо өткөн Hong Kong FinTech Week 2026 эл аралык форумунда тааныштырылды.
Демилгенин максаты – жаңы муундагы каржы борборлорун өнүктүрүү, эл аралык кызматташтыкты чыңдоо, тажрыйба алмашуу жана биргелешкен долбоорлорду ишке ашыруу.
Демилгени Кыргызстандын БУУдагы туруктуу өкүлү жана "Тамчы" башкаруу кеңешинин төрагасынын биринчи орун басары Аяз Баетов тааныштырып, каржы борборлорунун өнүгүшү санариптик технологияларды киргизүүгө, инвестиция тартууга жана өлкөлөр ортосундагы кызматташтыкка байланыштуу экенин белгиледи.
Белгилей кетсек, "Тамчы" атайын финансылык-инвестициялык аймагы Ысык-Көлдүн жээгинде жайгашкан жана англиялык жалпы укуктун принциптерине негизделген укуктук алкакта иш алып барган эл аралык финансылык аймак болуп саналат. Анын резиденттери үчүн атайын укуктук жана салыктык режим каралган.
